ಮಹಾಜನಗಳ ನಡುವೆ

ಮಹಾಜನಗಳ ನಡುವೆ

ಜಾರಿದ ಸೆರಗಿನ ಕಡೆ ಗಮನಿಸದೆ

ತರಾತುರಿಯಲ್ಲಿ ಹೊರಟ ಅವಳಿಗೆ 

ಮಾಡಿ ಮುಗಿಸಬೇಕಾದ ಕೆಲಸದ ಗಡಿಬಿಡಿ

 ಹೋಗದಿದ್ದರೆ ಹೇಳಿದ ಸಮಯಕ್ಕೆ 

ಕೈ ತಪ್ಪುವ ಭೀತಿ ಎದೆಯೊಳಗೆ

ಕೊಡುವ ಸಣ್ಣ ಪಗಾರದಲ್ಲಿ 

ಮತ್ತೊಂದಿಷ್ಟು ಸಣ್ಣ ಮೊಬಲಗು

ಐದು ಹತ್ತು ರೂಪಾಯಿಯೇ ಆದರೂ

ಅದೇ ಕೈ ಹಿಡಿಯುವುದು ತಿಂಗಳ ಕೊನೆಗೆ 

ಬರ್ತೀಯಾ? ತಾಸಿಗೆ ಇನ್ನೂರು

ಇಬ್ಬರಿದ್ದೇವೆ ಕೊಡುತ್ತೇನೆ ನಾನೂರು 

ಹಠಾತ್ತನೆ ಎದುರು ನಿಂತು ಕೇಳಿದ ಪ್ರಶ್ನೆ

ತನಗೇ ಎಂಬುದು ಅರ್ಥವಾಗಲೂ 

ಬೇಕಾಯಿತು ಅವಳಿಗೆ ಒಂದಿಷ್ಟು ನಿಮಿಷ  

ಬೆಪ್ಪಾಗಿ ನಿಂತವಳಿಗೆ ಮುನ್ನೂರಾದರೆ? 

ಮತ್ತೆ ಎದೆ ನಡುಗಿಸುವ ಪ್ರಶ್ನೆ 

ನಾನು ಅಂಥವಳಲ್ಲ ದನಿಯಲ್ಲಿ ಬಲವಿಲ್ಲ

ಜಾರಿದ ಸೆರಗಿನವಳು ಇನ್ನೇನಾಗಿರಲು ಸಾಧ್ಯ

ಎದೆಯೊಳಗೆ ಬಂದೂಕಿನ ಮೊನೆ ಮುರಿದ ಸದ್ದು

ನಿನ್ನ ಹೆಂಡತಿಯನ್ನೂ ಕರೆದು ತಾ

ಇಬ್ಬರೂ ಸೇರಿಯೇ ಬೀದಿಯಲ್ಲಿ 

ಮೆರವಣಿಗೆ ಹೊರಡುತ್ತೇವೆ ಸೆರಗು ಜಾರಿಸಿ

ಎದೆಯೊಳಗಿನ ಮಾತು ತುಟಿ ಮೀರಿ 

ಇನ್ನೊಂದು ಹೆಣ್ಣು ಜೀವ ನೋಯದಿರಲೆಂಬಂತೆ 

ಅವಡುಗಚ್ಚಿ ಕಣ್ಣೊಳಗೆ ತುಳುಕಿಸಿದಳು ನಗು  

ನಗು ಕಂಡವನೊಳಗೆ ಆತುರ ಮೈ ತುಂಬ 

ನಡೆ ನಿನ್ನ‌ ಮನೆಗೇ ಹೋಗೋಣ

ಎಂದವನ ತಡೆಯುತ್ತ ಹೇಳಿದಳು ತಣ್ಣಗೆ 

ಬೇಡ, ನಿನ್ನ ಮನೆಯೇ ಆದೀತು

ಇರಬಹುದು ಅಲ್ಲಿ ನಿನ್ನಪ್ಪ, ಅಜ್ಜನೂ 

ಕೊಡಬಹುದು ಅವರೂ ಮುನ್ನೂರು 

ನಿನ್ನ ಪುಟ್ಟ ಮಗನೂ ಇದ್ದರೆ ಒಳ್ಳೆಯದು

ಅವನೂ ಕೊಡುವ ಹಣ ಸೇರಿದರೆ  

ಸಿಗುವ ಆದಾಯದಿಂದ ಕೊಡಬಹುದು 

ನಿನ್ನವ್ವ ಹೆಂಡತಿಗೆ ಸೀರೆಯ ಉಡುಗೊರೆ

ಉಟ್ಟು ನಗಬಹುದು ಮೊಗವರಳಿಸಿ 

ಮಾತು ಮುಗಿಯುವ ಮುನ್ನವೇ 

ಹೊರಟವರ ತಡೆದು ಕೇಳಿದಳು ಸುತ್ತ ನೆರೆದವರ

ಬರಬೇಕೆ ನಿಮ್ಮಲ್ಲಿ ಯಾರ ಮನೆಗಾದರೂ

ತಗ್ಗಿಸಿದ ತಲೆಯೆತ್ತುವ ನೈತಿಕತೆಯೆಲ್ಲಿ 

ಸುಸಂಸ್ಕೃತರೆನಿಸಿಕೊಳ್ಳುತ್ತ ತಮಾಷೆ ನೋಡಿದ

ಮಹಾಜನಗಳ ಮಹಾ ಆಸ್ಥಾನದಲ್ಲಿ

ಚಿತಾಗ್ನಿಯಲ್ಲಿನ ಕೊರಡು

ಚಿತಾಗ್ನಿಯಲ್ಲಿನ ಕೊರಡು

ಆತ ಒಮ್ಮೆಯೂ ಹಿಂದಿರುಗಿ ನೋಡದೆ 

ಹೊರಟು ಹೋಗಿ ಅವನದ್ದೇ ಲೋಕದಲ್ಲಿ 

ತಲ್ಲೀನವಾಗಿ ಹಳೆಯದನ್ನೆಲ್ಲ ಮರೆತಿರುವಾಗಲೂ

ಹಿಂದಿರುಗಿ ಬಂದೇ ಬರುತ್ತಾನೆಂದು

ಅವನು ಹೋದ ಹಾದಿಗೆ ಕಣ್ಣು ಕೀಲಿಸಿ

ಕಲ್ಲಾಗಿ ಕಾಯುತ್ತಾಳೆ ಅಹಲ್ಯೆಯಂತೆ 

ಅವನೆಂದೂ ಹಿಂದಿರುಗಲಾರ

ಸ್ಪರ್ಶಿಸಿ ಮತ್ತೆಂದೂ ತನ್ನ ಹೆಣ್ಣಾಗಿಸಲಾರ

ಎಂಬ ಸತ್ಯ ಅರಿವಾಗುವಾಗುವಷ್ಟರಲ್ಲಿ 

ಅವಳು ತಲೆ ನೆರೆತ, ಬಾಗಿದ ಬೆನ್ನಿನ ಮುದುಕಿ 

ಅವನ ಬಣ್ಣಬಣ್ಣದ ಮಾತಿಗೆ ಅರಳಿ

ಕನಲಿ, ನಲುಗಿ ಸುರಿವ ಜೇನಿನಂತಹ

ಪ್ರೇಮವನ್ನು ಎದೆಯ ತುಂಬ ತುಂಬಿಕೊಂಡು

ವ್ಯಭಿಚಾರಿಯ ಪಟ್ಟ ಹೊರುವ ಹೆಣ್ಣುಗಳಿಗೆ

ಲೋಕದ ಅಪವಾದ ನಿಂದನೆಗಳನ್ನಷ್ಟೇ ಅಲ್ಲ

ಬೈಗುಳ, ಸಿಡುಕು, ತಿರಸ್ಕಾರಗಳನ್ನೆಲ್ಲ 

ವಿನಾಕಾರಣ ಎದೆಗೆಳೆದುಕೊಳ್ಳುವ ಹುಚ್ಚು 

ತಿರಸ್ಕರಿಸಿದಷ್ಟೂ ಸ್ವಾಭಿಮಾನವ ಮುಡಿಪಿಟ್ಟು

ಬಾಚಿ, ತಬ್ಬಿ, ಆದರಸುತ್ತ 

ಮಾಗಿ, ಬಳಲಿ, ಬೆಂಡಾಗಿ ಮುರಿಯುತ್ತ

ಬೂದಿ ತೀಡಿದ ನಿಗಿನಿಗಿ ಕೆಂಡ 

ಅವಳ ಒಳಹೊರಗನ್ನೆಲ್ಲ ದಹಿಸುವುದು 

ಜಗದ ಕಣ್ಣಿಗೆ ದೇಹ ದಹಿಸುವ ಚಿತಾಗ್ನಿ

ಅವಳಂತೂ ಉರಿದು ಬೂದಿಯಾಗುವ ಕೊರಡು

ಶ್ರೀದೇವಿ ಕೆರೆಮನೆ

ಹೇಳಿ ಹೋಗು

ಹೇಳಿ ಹೋಗು 

ನಿನ್ನನ್ನು ಮಾತನಾಡಿಸುವ 

ನನ್ನೆಲ್ಲ ತರೆಹವಾರಿ ಪ್ರಯತ್ನಗಳು

ಮಕಾಡೆ ಬಿದ್ದು ವಿಫಲವಾದ ನಂತರ 

ನಾನೂ ಸಹ ಮೌನವಾಗಿ 

ನಿನ್ನಿಂದ ದೂರ ಹೊರಟುಬಿಡುವ 

ಗಟ್ಟಿ ನಿರ್ಧಾರ ಮಾಡಿದ್ದೇನೆ

ಹೀಗೆ ಬಂದು ಹಾಗೆ ಹೋಗುವ

ನಿನ್ನ ಬಾಳ ಪಯಣದಲ್ಲಿ 

ಹೆಸರಿಲ್ಲದ ಒಂದು ಸಣ್ಣ 

ನಿಲ್ದಾಣ ನಾನಾಗಿದ್ದಕ್ಕೆ 

ಸಮಾಧಾನ ಪಡುವುದೋ 

ವಿಷಾದಿಸುವುದೋ ಎಂಬುದು

ಅರ್ಥವಾಗದೆ ದಿಗ್ಭ್ರಾಂತಳಾಗಿರುವಾಗ 

ಒಮ್ಮೆಯೂ ಹಿಂದಿರುಗಿ ನೋಡದೆ 

ನೀ ನಡೆದು ಹೋದ ಹಾದಿಯ 

ಬದಿಯ ಕಲ್ಲುಬಂಡೆಯಾಗಿದ್ದೇನೆ

ವಿದಾಯದ ಕಣ್ಣೀರನ್ನು ಒಳಗೊಳಗೇ ನುಂಗಿ

ಹೊರಟು ಹೋಗುವ ಮುನ್ನ 

ಒಂದೇ ಒಂದು ಮಾತು ಹೇಳಿ ಬಿಡು

ಅಲೆಗಳೇ ಇಲ್ಲದ ನನ್ನ ಬಾಳಲ್ಲಿ

ನೀನು ಬಂದು ತಂಪು ಸುರಿದಿದ್ದೇಕೆ

ಈಗ ಕಾರಣವೇ ಹೇಳದೆ 

ಹೊರಟು ಹೋಗುತ್ತಿರುವುದಾದರೂ ಏಕೆ?

...ಶ್ರೀದೇವಿ ಕೆರೆಮನೆ

ಜೊತೆಗಿರು

ಜೊತೆಗಿರು 

ಹೇಳುತ್ತೇನೆ ಮತ್ತೆ ಮತ್ತೆ ಜೊತೆಗಿರು

ಸಂತೆಯ ನಡುವೆಯೂ ಒಂಟಿ ಎನಿಸಿದಾಗ 

ಸುತ್ತೆಲ್ಲ ಗೆಳತಿಯರು 

ಯಾರಿಗೂ ಕೇಳದಂತೆ  ಪಿಸುಮಾತಲ್ಲಿ 

ತಮ್ಮ ಸಂಸಾರದ ಗುಟ್ಟುಗಳ ಬಿಚ್ಚಿಟ್ಟು 

ಕಿಸಿಕಿಸಿ ನಗುವಾಗ 

ಗುಟುಕರಿಸುವಾಗ ಹಳೆಯ ಗೆಳೆಯರೆಲ್ಲ ಸೇರಿ‌ 

ಕೇ ಕೇ ಹಾಕುತ್ತ ಬೈಟೂ ಚಹಾ  

ಕಿಬ್ಬೊಟ್ಟೆಯಲಿ ನೋವು ಅಲೆಅಲೆಯಾಗಿ ಉಕ್ಕಿ 

ತಿಂಗಳ ಮಾಮೂಲನ್ನು ವಸೂಲು ಮಾಡುವ 

ತಾಳಲಾಗದ ನೋವನ್ನು ಅವಡುಗಚ್ಚಿ 

ಒಮ್ಮೆ ನಿನ್ನ ಮಡಿಲಲ್ಲಿ ತಲೆಯಿಟ್ಟು 

ಸಂತೈಸಿಕೊಳ್ಳ ಬೇಕೆನಿಸಿದಾಗ 

ಕೆಲಸದ ನಡುವೆ ಹಿಂಬದಿಯ ಸೊಂಟ ಬಳಸಿ 

ಪಿಸುಮಾತು ಕಿವಿಯಂಚಲಿ 

ಬಿಸಿಯಾಗಿ ಕೇಳಿದಂತಾದಾಗ 

ಹೆಚ್ಚಿದ ತರಕಾರಿಯ ಜೊತೆ 

ಬೆರಳೂ ತರಿದು, 

ರಕ್ತ  ತುದಿಯಿಂದ ಬೆರಳಗುಂಟ ಧಾರೆಯಾದಾಗ 

ಮೀನು ಮುಳ್ಳು ಸರಕ್ಕನೆ ನುಗ್ಗಿ 

ಉಸಿರು ನಿಂತು ಹೋದಂತಾದಾಗ  

ಬಿಸಿ ಎಣ್ಣೆಯ ಕಾವಲಿಗೆ ಕೈ ತಾಗಿ 

ಚುರುಕ್ ಎಂದಾಗ 

ಮನದಲ್ಲೇ ನಿನ್ನ ನೆನೆಸುತ್ತ 

ನನಗೆ ನಾನೇ ಹೇಳಿಕೊಳ್ಳುವ ಜಪದಂತೆ 

ಜೊತೆಗಿರು ಎನ್ನುತ್ತೇನೆ 

ಇತ್ತೀಚಿಗಂತೂ ಜೊತೆಗಿರು ಎನ್ನುವ ಮಾತು 

ನನಗೆ ನಾನೇ ಪಠಿಸುತ್ತೇನೆ 

ಕೇಳುವುದು ಕ್ಲೀಷೆಯಾಗುವಂತೆ  

ವಿಷ್ಣು ಸಹಸ್ರ ನಾಮ, 

ಲಕ್ಷ್ಮಿ  ಸಹಸ್ರ ನಾಮದಂತೆ‌

ಜೊತೆಗಿರು ಎಂಬುದು ಆರಾಧನೆಗೊಳಪಡುತ್ತದೆ

ನಿನ್ನ ಹೆಸರಾಗಿ 

ಮನದೊಳಗೆ ಪ್ರತಿಷ್ಟಾಪನೆಗೊಂಡು  

ಇಷ್ಟಾದರೂ ಇಲ್ಲ ನನಗೆ 

 ನಾನು ಜೊತೆಗಿರು ಎಂದುಕೊಳ್ಳುವುದು 

ನಿನ್ನ ಕಿವಿಗೆ ತಲುಪಿಯೇ ಬಿಡುತ್ತದೆ 

ಎನ್ನುವ ಯಾವ ನಂಬಿಕೆಯೂ 

ಆದರೂ ಮೈದುಂಬಿ ಸುಖಿಸುತ್ತದೆ 

ಹಾಗೆಂದಾಗ ನೀನು ಜೊತೆಗಿರುವ 

ಅಮೂರ್ತ ಅನುಭವ 

ಕೆಲವೊಮ್ಮೆ  ನಾನು ಜೊತೆಗಿರು ಎಂದಾಗ

ನಿನ್ನ ಕಿವಿಗೆ ತಲುಪಿ 

ಇದ್ದೇನಲ್ಲ ಸದಾ ಜೊತೆಗೆ 

ಯಾಕೆ ಮತ್ತೆ ಮತ್ತೆ ಅದೇ ಮಾತು 

ನೀನು ಮಾತು ಮುಗಿಸಿ ಬಿಡುವುದೂ 

ಹೊಸ ವಿಷಯವೇನೂ ಅಲ್ಲ ನನಗೆ 

ಇಷ್ಟಾಗಿಯೂ ಹೆಚ್ಚಿನ ಸಲ 

ಜೊತೆಗಿರು ಎಂಬ ನನ್ನ ಗೋಗರೆತದ ದನಿ 

ನಿನ್ನ ಮೆದುಳು ತಲುಪಿ 

ಪ್ರತಿಕ್ರಿಯೆ ಬಂದೇ ಬರುತ್ತದೆಂಬ ನಂಬಿಕೆಯೇನಿಲ್ಲ  

ಆದರೂ ಹೇಳುತ್ತೇನೆ 

ಹೇಳುತ್ತಲೇ ಇರುತ್ತೇನೆ 

ಹೇಳುತ್ತ ಹೇಳುತ್ತಲೇ ಉಸಿರು ನಿಲ್ಲಿಸುತ್ತೇನೆ 

ಜೊತೆಗಿರು, ಕೊನೆಯ ಉಸಿರಿರುವವರೆಗೆ  

.....ಶ್ರೀದೇವಿ ಕೆರೆಮನೆ

ಆಗುವುದೆಲ್ಲ ಒಳ್ಳೆಯದಕ್ಕೆ

ಆಗುವುದೆಲ್ಲ ಒಳ್ಳೆಯದಕ್ಕೆ

ಈ ಭಾವುಕ ಕ್ಷಣದಲ್ಲಿ

ನೀನು ಜೊತೆಗಿರದಿದ್ದುದು ಒಳ್ಳೆಯದಾಯಿತು

ಇಹದ ಪರಿವೆಯೇ ಇಲ್ಲದೇ ಮೈ ಮರೆತು 

ಪೂರ್ಣವಾಗಿ ನಿನಗೊಪ್ಪಿಸಿಕೊಂಡು 

ಬಿಡುವ ಅನಾಹುತವೊಂದು 

ಸ್ವಲ್ಪದರಲ್ಲಿಯೇ ತಪ್ಪಿ ಹೋಯಿತು. 

ಅದೆಷ್ಟು ಮಾತು, ಅದೆಂತಹ ಲಲ್ಲೆ

ಮಾತು ಮಾತಿಗೂ ಎದೆಯಾಳದಿಂದ

ಬಿಸಿ ನೀರಿನ ಬುಗ್ಗೆಯೊಂದು

ಒಮ್ಮೆಲೆ ಚಿಮ್ಮಿ ಬೆಚ್ಚಗಾದಂತೆ 

ದೇಹದ ಕಣಕಣವೂ ಹಂಬಲಿಸಿ 

ಎದೆಯೊಳಗೆ ಹರಿಯುವ 

ಜುಳು ಜುಳು ನದಿಗೆ 

ಪ್ರವಾಹ ಬಂದು ಉಕ್ಕೇರಿದಂತೆ

ಸುಪಾ ಆಣೆಕಟ್ಟಿನ ಹಿನ್ನೀರಿನಂತೆ

ಸದಾ ಒದ್ದೆ ಒದ್ದೆಯಾಗಿರುವ 

ಮನದಂಗಳದ ತುಂಬೆಲ್ಲ 

ನಿನ್ನದೇ ಹೆಜ್ಜೆಗುರುತು

ಈ ಚಂಚಲಗೊಂಡ ಸ್ಥಿತಿಯಲ್ಲಿ 

ನೀನು ಸನಿಹ ಬರದಿದ್ದುದು ಸರಿಯಾಗಿತ್ತು

ಹಸಿಯಾದ ಎದೆಯ ಮೆತ್ತೆಗೆ

ಮೂಡುವ ನಿನ್ನ ಉಗುರಿನ ಗುರುತಿಗೆ

ನಾನು ಹೊಸತಾದ ಕಾರಣ ಹುಡುಕಲು

ಸುಳ್ಳಿನ ಕಣಜದ ಮೊರೆ ಹೋಗಬೇಕಿತ್ತು  

ಹದವಾದ ಭೂಮಿಗೆ ಬೀಜ ಬಿತ್ತುವಂತಿರುವ

ಈ ನಾಜೂಕಾದ ಗಳಿಗೆಯಲ್ಲಿ

ನಿನ್ನ ಮೈಯ್ಯ ವಾಸನೆ ಆಘ್ರಾಣಿಸಲು 

ಆಗದಿದ್ದುದು ಸಮಂಜವೇ ಆಗಿತ್ತು

ಕುತ್ತಿಗೆಯ ತಿರುವಿನಲ್ಲಿ ಮೂಡುವ

ಹಲ್ಲಿನ ಗುರುತಿಗೆ ಸಬೂಬು ಹೇಳಬೇಕಿತ್ತು

ಶಂಖುತೀರ್ಥದ ಹೊಕ್ಕಳ ಆಳದಲ್ಲಿ

ನಿನ್ನ ಬೆರಳ ತುದಿಯ ನಾಜೂಕು

ಸ್ಪರ್ಶದಿಂದೇಳುವ ಪ್ರಚಂಡ ಅಲೆಗೆ

ಎಲ್ಲ ಮರೆತು ಸುಖವಾಗಿ ಪವಡಿಸಿರುವ 

ಕಡಲೆಂಬ ಕಡಲೂ ಬೆಚ್ಚಿ ಬೀಳುತ್ತಿತ್ತು

ಆಗುವುದೆಲ್ಲ ಒಳ್ಳೆಯದಕ್ಕೇ ಬಿಡು

ಸಕಲವೂ ಕ್ಷೇಮ ಎಂದಾದಾಗ

ಸವುಡು ಸಿಕ್ಕರೆ ಮತ್ತೆಲ್ಲಾದರೂ ಭೇಟಿಯಾಗೋಣ

ಎರಡು ಮಾತು ಚಿಕ್ಕದೊಂದು ನಗುವಿನೊಂದಿಗೆ

ಶ್ರೀದೇವಿ ಕೆರೆಮನೆ