ಉಸಿರುಗಟ್ಟುವ ಕೋಶದ ರಚನೆಯಲ್ಲಿ

ಉಸಿರುಗಟ್ಟುವ ಕೋಶದ ರಚನೆಯಲ್ಲಿ 

ಇವಳು ಹತ್ತಿರ ಸರಿದಾಗಲೆಲ್ಲ

ತನ್ನದೇ ಲೋಕದಲ್ಲಿ ಮುಳುಗಿರುವ 

ಆತ ತೋರುತ್ತಾನೆ  ನಿರ್ಲಕ್ಷ 

ಇವಳು  ಮತ್ತೆ ಅಂತರ ಕಾಯ್ದುಕೊಳ್ಳುತ್ತಾಳೆ 

ಆತನಿಗೇನೋ ಹೇಳಿಕೊಳ್ಳುವುದಿದೆ 

ಆ ದಿನ ಆತ ತೋರಿದ ನಿರ್ಲಕ್ಷಕ್ಕೆ

ಪ್ರತಿಕಾರ ತೋರಲೆಂದು 

ಮಾತಿಗೆ ಮೌನ ಲೇಪಿಸುತ್ತಾಳೆ 

ಈತ ಹತಾಶನಾಗುತ್ತಾನೆ 

ಒಮ್ಮೆ ಸಾಕಾಗಿ ಪ್ರೀತಿಸುತ್ತೇನೆಂದು 

ಕಳಿಸಿದರೆ ಮೆಸೆಜು

ಯಾರದ್ದೋ ಕೈಗೆ ಸಿಕ್ಕಿ ಅನಾಹುತವಾಯಿತೆಂದಿದ್ದು

ಅತ್ಯದ್ಭುತ ರಂಗಭೂಮಿ ಪ್ರದರ್ಶನದ

ಅಭಿನಯ ಚಾತುರ್ಯ 

ಎಂದುಕೊಂಡ ಅವಳು 

ಮರುದಿನವೇ ಅನಾರೋಗ್ಯ ಅಂದವನಿಗೆ 

ಒಂದು ಕಾಳಜಿಯ ಮಾತೂ ಆಡದೆ 

ತಿರುವಿದಳು ಬಿಮ್ಮಿಸಿ ಮುಖ ಸುಮ್ಮನೆ  

ಅದೆಷ್ಟು ದಿನವಾಗಿದೆ ಮನಬಿಚ್ಚಿ ಮಾತಾಡಿ 

 ಸಹನೆಯಿಂದ ಆಲಿಸಿಯೂ ಅಷ್ಟೇ ದಿನವಾಗಿದೆ  

ಒಮ್ಮೆ ಎಲ್ಲವನ್ನೂ ತೆರೆದಿಟ್ಟು  

ನಿರುಮ್ಮಳವಾಗುವ ಬಯಕೆಯಿದೆ

ಇಬ್ಬರ ಮನದೊಳಗೂ 

ಆದರೂ ಒಳಗಿನ ಅಹಂ 

ಬಿಡುತ್ತಿಲ್ಲ ಮನಬಿಚ್ಚಿ ನಿಸೂರಾಗಲು 

ಇವನು ಅವನನ್ನು 

ಅವನು ಇವಳನ್ನು ಸದಾ ಬೇಟೆಗಣ್ಣಿಂದ

 ಹಿಂಬಾಲಿಸಿಸುತ್ತಿರುವುದರ ಅರಿವು 

ಇದೆ ಇಬ್ಬರಿಗೂ 

ತಪ್ಪುವುದಿಲ್ಲ ದಿನಂಪ್ರತಿ

ನೋಡಿಯೂ ನೋಡದ ಸೋಗು ಹಾಕುವುದು 

ಈಗೀಗ, 

ಕೋಪಿಸಿಕೊಂಡಿದ್ದು ಅರಿವಾಗಲೆಂದು 

ಮಾತಿಗೆ ಮೌನದ ಬೀಗ ಹಾಕಿದ್ದು 

ಖಾಯಂ ಆಗಿ ಉಳಿದು ಹೋಗಿದೆ 

ಅವಳ ಮಾತು ಇವನಿಗೆ 

ಇವನ ಮಾತು ಅವಳಿಗೆ 

ಕೇವಲ ಮಾತುಗಳಷ್ಟೇ ಆಗಿ 

ಕೆಲವೊಮ್ಮೆ ನಾಟಕದ ತಾಲೀಮು ಎನಿಸಿ

ಕೇಳುವ ವ್ಯವಧಾನವೂ ಇಲ್ಲದಂತೆ  

ತಟಸ್ಥವಾಗಿವೆ ಭಾವನೆಗಳು

ಆದರೂ ಹೇಳುವ ಮನಸಾಗುತ್ತದೆ ಒಮ್ಮೊಮ್ಮೆ  

ಹೊಸದಾಗಿ ಪ್ರೇಮಿಸೋಣವೆಂದು 

ನಾಲಿಗೆಯ ತುದಿಗೆ ಬಂದ ಮಾತುಗಳು 

ಮತ್ತೆ ಅಡಗುತ್ತವೆ 

ಶ್ರೇಷ್ಠತೆಯ ವ್ಯಸನದ ಗೂಡೊಳಗೆ 

ಅವರಿಗವರೇ ರಚಿಸಿಕೊಂಡ ಕೋಶ 

ಉಸಿರುಗಟ್ಟಿಸುತ್ತಿದೆ ನಿಧಾನವಾಗಿ