ನಿಜ ಬದುಕಿನ ಜಂಜಾಟ

ನಿಜ ಬದುಕಿನ ಜಂಜಾಟ

ಅರ್ಥವಾಗುತ್ತಿದೆ ಈಗೀಗ  ಇಷ್ಟಿಷ್ಟೇ 

ಸುಖವೆಂದರೆ ಏನೆಂಬುದು 

ನಿಧಾನವಾಗಿ ಈರುಳ್ಳಿಯ ಸಿಪ್ಪೆ ಸುಲಿದು 

ಪದರ ಬಿಡಿಸಿದ ಹಾಗೆ 

ಏಳುಸುತ್ತಿನ ಕೋಟೆಯೊಳಗೆ ಬಂಧಿಯಾದ 

ಏಳು ಮಲ್ಲಿಗೆ ತೂಕದ 

ಬಳುಕಾಡುವ ರಾಜಕುಮಾರಿಯನ್ನು 

ಅದೆಲ್ಲಿಂದಲೋ ಕುದುರೆಯೇರಿ 

ಬಂದ ಸುಂದರಾಂಗ

ಕಾವಲಿಗಿದ್ದ ರಕ್ಕಸನನ್ನು ಕೊಂದು 

ಒಲಿಸಿ ವಿವಾಹವಾದ ನಂತರ 

ತಪ್ಪದೆ ಹೇಳುತ್ತೇವಲ್ಲ 

ಬದುಕಿದರು ಇಬ್ಬರೂ ಸುಖವಾಗಿ 

ನೂರು ವರ್ಷಗಳ ಕಾಲ 

ಎಂಬ ಸುಳ್ಳಿನ 

ಕಥೆ ಕಟ್ಟಿದಂತಲ್ಲ ಎನ್ನುವುದು 

ಶುರುವಾಗುತ್ತದೆ ಅನಂತ ಕೋಟಿ 

ಕಷ್ಟ ಕಾರ್ಪಣ್ಯಗಳೆಲ್ಲ 

ಮದುವೆಯಾಗಿ, ಮೊದಲ ಹಸಿಬಿಸಿಯ

ಕಾವುಗಟ್ಟಿ ಹುರಿಗೊಂಡದ ದೇಹದ 

ಮೈ ಬಿಸಿಯೆಲ್ಲ ಇಳಿದು 

ತುಸು ವಿರಮಿಸಿ 

ಆಚೀಚೆ ನೋಡ ತೊಡಗಿದ ಮೇಲೆ 

ಕನಸಿನ ಕನ್ಯೆಯಲ್ಲ ಈಕೆ 

ಮೊದಲು ಕನವರಿಸಿ ಕಾತರಿಸಿದಂತಿಲ್ಲ 

ಮೈ ಬಣ್ಣ ತುಸು ಕಪ್ಪು 

ಮೊಂಡು ಮೂಗು, ದೊಡ್ಡ ಹಣೆ 

ಇದ್ದುದರಲ್ಲಿ  ಪರವಾಗಿಲ್ಲ 

ನೀಳವಾದ ಕಡುಗಪ್ಪು ಕೂದಲು 

ತನ್ನಂತಹ ಅಚ್ಚ ಬಿಳುಪಿನ ಗಂಡಿಗೆ 

ತಕ್ಕವಳಲ್ಲ ಎಂಬ ಹಳಹಳಿಕೆ 

ಅವಳಿಗೂ ಅವಳದ್ದೇ ಕೊರಗು 

ಗಂಡಸು ಚಂದವಿದ್ದರಷ್ಟೇ ಸಾಕೆ? 

ಬೇಡವೆ ಸಂಸಾರ ಸಾಗಿಸಲು 

ಕೈ ತುಂಬ ಸಂಬಳ? 

ಚಂದ ನೋಡಿ ಬಣ್ಣಗೆಟ್ಟ ಆತಂಕ ಇವಳಿಗೆ 

ಒಬ್ಬರಿಗೊಬ್ಬರು ಹಾಗೆ ಹೀಗೆಂದು 

ಹೀಗಳೆದು ಬೈಯ್ದಾಡಿಕೊಳ್ಳುವ

ನಡುವಿನ ಚಿಕ್ಕ ಸಮಯದಲ್ಲೇ 

ತೀರಿಸಿಕೊಂಡ  ದೇಹದ ಕಾವಿಗೆ 

ಹುಟ್ಟಿದ ಮಗು 

ಅರ್ಥವಾಗಿದೆ ಈಗ ಸುಖವೇನೆಂಬುದು 

ಜಗಳವಾಡದೆ ತುಸು ಸಮಾಧಾನದಲಿ 

ಕಳೆದರೆ ಒಂದು ದಿನ 

ಜಗದ ನಿಜದ ಸುಖ ಎನ್ನುವ ಸತ್ಯ